எசித்தியர் அடிமையினின்று யூதரை மீட்டு உரிமை மக்களாக
வாழ்வித்தமையின், மோயிசன் யூதர் கோலை நிமிர்த்தியவன் ஆவான்.
'கோல்' இங்கு ஆட்சிக்கு ஆகுபெயர்.

     பத்துக் கட்டளைகள்

     "நீதியினின்று கோணுதல் இன்றி யாவற்றையும் ஆண்டு நடத்தும்
வானகத்துள்ள ஆண்டவன் இட்ட கட்டளையை ஏற்றுக் கொண்ட யூதர்
குல மன்னனாகிய மோயிசன் நெடுந்தூரம் கடந்து சென்றான்; அவ்வாறு
வானளாவிச் சென்ற மலையின் உச்சிக்குச் செல்கின்றான்; அங்கு
உணவையும் துறந்தான், உறக்கத்தையும் மறந்தான்; இவ்வாறு, வானவருக்கு
நிகராக அங்குத் தங்கியபோது, அறமாண்பற்றவர் மனம்போல இருண்டு,
யாவும் மயக்கம் கொண்டன.