வானத்தில் தோன்றும் சந்திரன் தன்னைத் தாங்கி நிற்கும்
அழகிய வடிவம் கொண்ட திருவடிகளை உடைய மரியாளும், தேன்
நிறைந்த மலர்க் கொடி ஏந்தித் திருமறை வாழும் அறை போன்ற
சூசையும், ஊனோடு கூடிய மனித உருவம் கொண்ட குழந்தை நாதனின்
ஒளி பொருந்திய அடிகளைத் தொழுது ஏந்தி யெடுத்துக் கொண்டு, மணம்
பொருந்திய மலர்கள் பூத்த சிறந்த சோலை வழியாக நடந்து போயினர்.

     ஆழ் துயிலில் மூழ்கியதுபோல் விரிந்து கிடந்த பூஞ்சோலையில்
வண்டுகள் குழல் ஊதுவனவாகவும், குயில் இனங்கள் கொம்பு
ஊதுவனவாகவும், குளிர்ந்த வனமே நாடக அரங்காகவும் கொண்டு, மயில்
இனங்கள் நடனமாடும் தேன் வழிந்தோடும் அச்சோலை வழியைக் கடந்து,
அம்புபோல் நெருப்பை அள்ளி வீசும் அரிய பாலைவனத்து வழியில்
அவர்கள் தொடர்ந்து சென்றனர்.

     சீலையைக் குறிக்கும் 'துகில்' என்ற சொல், எதுகைப் பொருட்டு,
இடைப் போலியாகத் 'துயில்' என வந்தது என்று கொண்ட பழையவுரை
தவறு. இவ்வாறு பிறிதொரு பொருள்படும் சொல் போலியாக அமைதல்
இல்லை.