மின்னலென்னும் அழகிய கொடியை மேலே சூட்டி, விளங்கிய
மணிகளைப் போன்ற வான வில்லாலாகிய நல்ல நிறமுள்ளமாலையை
அணிந்து தம்மை நாடிவந்து அணியணியாகத் தோன்றும் மேகமென்னும்
நிறக் குடையினால் மறைக்கப்பட்டும் செழித்து நின்ற பகலவன்
வெப்பத்தின் நடுவே தோன்றிய இனிய அழகிய குளிர்ந்த மெல்லிய
நிழலில் இயங்குதலாகிய சிறப்போடு அவர்கள் சென்றனர்.

     வெல்லப் பாகின் இளஞ் சுவை பெய்து வைத்ததும் ஒளி நிறைந்த
பவளம் போன்றதுமாகிய தன் வாயாகிய துறையில் இட்டுவைத்த,
சங்கிடத்துப் பிறந்த இளமுத்துப் போன்ற பற்களைக் காட்டிப் புன்முறுவல்
செய்யும் மங்கைபோல, அங்குப் பாலையினின்று உண்டாகிய இளம்
பனிபோல் குளிர்ந்த பூஞ்சோலையில், அழகுக்கு அழகு செய்தாற்போல,
அழகு நின்று இளங் கதிர் பரப்பும் மேனியை வானவர் காட்டி நின்றனர்.