சூசையின் போற்றிப் பாடல்

          வெண்டளை, வெண்டளை, வெண்டளை, வெண்டளை

     "மாலையின் ஒழுங்கு போல அருளும் நீதியும் வல்லமையும்
கொண்ட ஆண்டவனே, நீ பாலை நிலத்தின் வெப்பத்தைக் குளிர்ந்த
மருத நிலத்துக்கு ஒப்பாக மாற்றினாய்! அருளும் நீதியும் வல்லமையும்
கொண்ட இவ்வாண்டவன் அடியைச் சார்ந்தவர், தெளிந்த நீதி
நீங்காதவராய், இவ்வுலகில் தீமையும் துன்பமும் அடைய மாட்டார்.

     "இவ்வுலகில் தனக்கு நிகராகக் கூறுதற்கு உவமையே இல்லாது
கடந்து நின்ற எம் தந்தையாகிய ஆண்டவனின் திருவடியைச்
சரணென்று அடைந்தால், பொங்கி எழுந்த கடல் நீரும் நிலை கொண்டு
நிற்கத் தக்கதாகும்; கொடிய நஞ்சும் இனிய அமுதமாகும்! எங்கும்
துன்பம் திரண்டு உலவிக் கொண்டிருக்க, எம் தந்தையாகிய ஆண்டவனின்
திருவடியைச் சரணென்று அடைந்தவர் மட்டும் மன மகிழ்ச்சிக் கொண்டு,
தீமையும் துன்பமும் அடையார்.