"யூதர்கள் நொந்து நொந்து அழுத ஓசை இடையறாது வந்து வந்து
உயர்ந்த வானத்தின் உச்சியில் நுழைந்து எட்டியது. கருணைமிக்க
ஆண்டவன் அதனைக் கேட்டு, வருந்திய அம் மக்களுக்கு இரங்கினான்;
ஒரு மலையில் முன்னுற நின்று ஆடு மேய்த்துக்கொண்டிருந்த மோயிசனை
அழைத்து, ஒரு பிரம்பைக் கொடுத்து, உன் குலத்தைக் கொன்ற தன்மையாய்
வருத்தும் மன்னன்பால் தூதாக விரைந்து செல்வாயாக" என்றான்.

     ஏகுக+என்றான் - 'ஏகுக வென்றான்' என வேண்டியது,
'ஏகுகென்றான்' எனத் தொகுத்தல் விகாரமாயிற்று.

     'அக்கொடிய மன்னனுக்கு நீ அஞ்சாதே! அவனே குலைந்து
அஞ்சுமாறு பேசி, "விடிந்ததும் சிறந்த வழிபாடு நடக்குமாறு யூத மக்களை
அனுப்புவாய்" என்று கேட்டு, அவன் அனுப்பவில்லையானால், நெடிய
இப்பிரம்பை உயரச் சுழற்றி, மன்னனோடு மற்றெல்லோரும் அஞ்சுமாறு,
கடுமையான ஒரு துன்பத்தைக் கொண்டு செலுத்தி, என் சினத்தின்
வல்லமையைக் காட்டுவாயாக' என்று ஆண்டவன் கூறினான்.

     காட்டுகென்றான் - 'காட்டுகவென்றான்' என்பதன் தொகுத்தல்
விகாரம்.