"தெளிவுற மின்னி முழங்கிய மேகத்தைச் சென்று சேருமாறு படர்ந்த
மரங்களின் உச்சியில் தேனைக் கொண்டு மலர்ந்த இச் சோலையைக் கண்டு
இதன் அருகே தான் செல்லுகையில், காம வேட்கை உள்ளத்தில்
விளையுமாறு புதிய தென்றலாகிய தேரின் மேல் ஏறிச் செலுத்தும் மன்மதனே
எதிர்கொண்ட தன்மை போல, அள்ளிக்கொள்ளத் தக்க வண்ணம் மணத்தை
உமிழ்ந்த காற்றை அங்கு எதிர்கொண்டான்.

     "மணிகளாலும் பொன்னாலும் செய்த அணிகலன் போன்ற மார்பு
கொண்ட நீபகன், யாரோ புலம்பும் உரையைக் கேட்டு அவ்விடம்
நோக்கிச் செல்கையில், இனிய திரைகளைச் சுருட்டியடிக்கும் ஓர் ஆறு,
இப்பூஞ்சோலையை ஒருங்கு சுற்றி வளைத்து, இரண்டு மாலைகள் போல்,
மொட்டாயிருந்து தேன் கொண்ட மலராக விரிந்து கிடந்த இரண்டு
கரைகளிடையே நிறைந்து, சிலம்பு ஒலிப்பது போல் ஒலித்துக்கொண்டு
ஓடக் கண்டான், தான் அவ்வாற்றைக் கடக்க இயலாதவன் ஆனான்.