"இழிந்த மன்னனின் உள்ளத்தைப் போன்று, அள்ளிக் கொள்ளத்
தக்க குவியல் போல இருள் மொய்த்து, ஆடாத கையால் அச்சிறையைக்
கடக்க மாட்டாமல், காலும் சிறைக்கு உள்ளாகி, எங்கும் தம் உடம்பு
சிறைப்பட்டுக் கிடந்த யாவரும் அஞ்சிக் கூக்குரலிட்டு அலறி நோகவே,
இருளினால் சிறைப்பட்ட அந்நாடு, பாவத்தின் சிறைக்கூடமாகிய நரகத்தை
ஒத்துத் தோன்றும்.

              விடுதலை தந்த பத்தாம் வாதனை

     - விளம், -மா, -விளம், -மா, -விளம், -விளம், -மா

     "அங்கு அடைக்கலமாய் வந்தடைந்த யூதர்களை அடிமைகளென்று
ஆக்கிய கொடுஞ் செயல் மாறாத பாவம் நிறைந்த கொடிய எசித்து
மன்னனைப் பணிவிக்கும் பொருட்டு, உலகத்திலுள்ள மன்னரையெல்லாம்
ஆளும் மன்னனாகிய ஆண்டவன், சபித்துத் தந்த ஒப்பற்ற சாபங்கள்,
வெப்பமான இரத்தம், தவளை, உண்ணிகள், ஈக்கள், விலங்குகளுக்கு
நேர்ந்த நோய்' மனிதர்க்குக் குட்ட நோய், ஆலங்கட்டி மழை, கூட்டமாக
வந்து சேரும் வெட்டுக் கிளிகள், செறிந்த இருள் என்னும் ஒன்பதும் ஆகும்.