மக்களிடம் பொருந்திய பாவங்களைத் தீர்க்கும் அம்மூவரும் அதன்
கரையில் தங்கினர். அப்பொழுது, அழகெல்லாம் ஒருங்கே பொருந்திய
திருமகனைத் துதி பாடுவனவாக, தொகையால் மிகுந்து அடக்கங்கொண்ட
குயில்கள் பாடுதலினால், தேன் உள்ளடங்கக் கொண்ட மலர்கள் விரிந்து
இன்புறுதலைத் தாம் கண்டனர்.

     கரைமேல் இருந்த இம்மூவர் நமக்குக் காட்டும் அருள் போல,
அங்கு வரிசையாய் நின்ற நிழல் கொண்ட நெடிய மரங்களெல்லாம்
மணம் பொருந்திய தம் மலர்களை விரித்த போது, அவற்றின் தேன்
துளிகள் நுண்ணிய மணல் மீது நுரை நுரையாய்க் கிடந்தன.

     விண்மீன்களை அணிந்த கூந்தலையுடைய மெல்லிய கொடி போன்ற
மரியாள் பெற்ற காளையாகிய குழந்தைநாதன் கொண்டிருந்த முகத்தின்
அழகைக் காணும் பொருட்டு, வாளை மீன்களைக் கொண்ட ஊற்று நீருள்ள
தடாகம் மலர்ந்து, தண்டைக் கொண்டுள்ள கருங்குவளை மலர்களைத் தன்
கண்களாகக்கொண்டு நோக்கும்.