'ஆல்' அசை நிலை. 'மலர்ந்து' என்றபோது, தாமரை செவ்வாம்பல்
கருங்குவளை போன்ற எல்லா மலர்களையும் கொள்க; 'விழி' என்றவிடத்து,
கருங்குவளை ஒன்றே கொள்க. 'குழல்' என்றது சினையாகு பெயராய்த்
தலையைக் குறிக்கும்.

     சொல் என்னும் அணிகலத்தில் அடங்காது உயர்ந்த அம் மூவரும்
சுவையோடு அருந்துமாறு, பொற்கலத்தில் அமுதைப் பொழிந்து
தருவார்போல், வில்லொளி பரப்பும் அணிகள் போல் ஒளிரும் பூக்கள்,
விரித்த தம் இதழ்களாகிய கலங்களில் தேனை நிறைவாக ஏந்தித் தந்தன.

     'தந்தன' என்ற பன்மைக்கேற்ப, 'தம்' என வரவேண்டிய விரவுப்
பெயர், எதுகைப் பொருட்டு, 'தன்' எனத் திரிந்து நின்றது.