கயல் மீன் போன்ற கண்களைக் கொண்ட களிப்புள்ள மகளிர்,
கரிய வான் மேகம் போன்ற தடாகத்துத் திரையுள்ளே களித்து
விளையாடின ஒப்புமை கண்டு, அவ்வியல்புக்கு ஏற்றவாறு, அத்தடாகத்துள்
திரியும் இறகு கொண்ட அன்னம் போன்ற உயிரினங்களும், அகலமான தம்
சிறகுகளை விரியவிட்டு, அம்மூவர்க்கும் அயலே இனிதாய் விளையாடிக்
கொண்டிருந்தன.

     ஒத்தன, உற்றன என்னும் சொற்கள், ஒத்த, உற்ற என்ற பெயரெச்சப்
பொருளில் இடையே 'அன்' சாரியை பெற்று நின்றன.

     பல வகைப் பிற பறவைகளும், நாரைகளும், கொக்கு இனங்களும்.
அழகில் பிறவெல்லாம் ஒவ்வாதன என்று புகழ்ந்து சொல்லப்படும் தன்மை
கொண்ட அன்னங்களும், பகையினின்று விலகியதும் களிப்பு
விளைவிப்பதுமான ஒரு போரை நினைந்த வண்ணமாகவும், ஒன்றையொன்று
நெருங்கும் தன்மையாகவும், குதிக்கும் தன்மையாகவும் அங்கு உள்ளன;
அவை குதிக்கும் குதிரை போல் அங்கு வந்து, அம்மூவர்க்கும் எதிரே
தொடர்ந்து வந்து நெருங்கி நிற்கும்.

     'பல புள்ளும்' என மாற்றிக் கூட்டுக. 'ஆல்' அசைநிலை