'அரோ' அசைநிலை. பின் வரும் பாடலுக்கும் இது கொள்க.

     ஒளி சூழ்ந்த மணிகளை வரிசையாகப் பதித்து, சிங்க உருவங்கள்
சுமந்து நிற்கும் இருக்கையின் மீது, அழகு பொருந்திய முடி அணிந்த
மன்னன் வீற்றிருப்பதும், பாதுகாப்பாகச் சூழ்ந்த மதிலோடு பொலிவதும்,
இரவிமாபுரம் என்னும் பெயரைக் கொண்டதுமாய், அழகு மேலோங்கிய
நகரம் அதுவாகும்.

     அந்நகரம், தன் மீது கவிந்த கருமேகம் கூந்தலின் அழகைத் தந்து
நிற்கும் கோபுரமாகிய அழகு விளங்கும் முகம் மலர்ந்து, மதிலாகிய
ஆடையின் மேல் சிறப்பைத் தரும் கொங்கையாகிய பொம்மைகள்
சேர்க்கப்பெற்று, அகழியின் நீரால் அமையும் மேகலை அணிந்து சிறந்து
நின்றது.