'கவிழ்ந்த கார் குழல் நலம் செய்யும்' என மாற்றிக் கூட்டுக.
'நாஞ்சில்' என்பது 'ஞாஞ்சில்' திரிந்தது, விகாரம்.

     அழகிய முகம் படைத்த அந்நகரத்தின் அடியில் கிடந்து ஒலிக்கும்
சிலம்புபோல, ஏழு முகமாகப் பிரிந்து பாயும் நீல் என்னும் இனிய நீர்
கொண்ட ஆறு, பயிர் செழித்த இந்நிலவுலகம் கெடுமாறு பேய்
முற்காலத்தில் உருவமாய்க் கொண்ட ஏழு நஞ்சுத் தலையுள்ள நாகம்
போலக் கவர் பிரிந்து ஓடும்.

     'ஆல்' அசைநிலை. பின்வரும் பாடலுக்கும் இது கொள்க. 'முகம்'
தலைக்கு ஆகு பெயர்.

     மலை மூச்சு விடுதல் போல் நறுமணப் புகை சூழும் மாளிகைகளின்
உச்சி மீது, நுரை பொங்கிப் பரவுதல் போல் இடைவிடாமல் அசையும்
அழகிய துணிக்கொடிகள், தம் வாயின் உரை அவ்விடம் சென்று
எட்டாதெனக்கண்டு, ஒளி பொருந்திய கைகளை நீட்டி, விரைந்து
அடிக்கும் காற்றோடு கூடி இம்மூவகையும் அழைத்தல் போலத் தோன்றும்.