"மேகம் தவழும் மலைகள் தோறும், மண மலர்ச் சோலைகள்
தோறும், அழகு பொருந்திய நகரங்கள் தோறும், மற்றும் எண்ணற்கரிய
இடங்கள் தோறும் சிறப்புப் பொருந்திய கோபுர உச்சியால் உயர்ந்து
சிறந்து நின்ற என் கோவில்கள் யாவும், போர் நடைபெறும் களங்களில்
சிதறிக் கிடக்கும் புழுதி போல் தகர்ந்து கிடக்கக் கண்டேன்.

     'எண்ணவரும்' என்றிருக்க வேண்டியது 'எண்ணரும்' என வந்தது
தொகுத்தல் விகாரம்.

     "பொன் மயமான ஒளியை வெளிவிடும் அழகிய சாந்தினாற் செய்த
தேவர் உருவங்களும், அவை அணிந்திருந்த, பார்ப்பவர் முகத்தில்
மின்னலை வீசும் கதிர்க் கற்றை பரவும் மணி முடிகளும், மாலைகளும்,
நிலைபெற்ற தன்மையாய் அழகு கொண்ட பொன்னாற் செய்த தேர்களும்,
மற்றும் சிறந்த அணிகலன்கள் யாவும், வீணான தன்மையாய் அவற்றிற் குடி
கொண்டிருந்த பேய்களோடும் குழைந்து அழிந்தனவாகக் கண்டேன்.