"நெடிய பெரிய கடல் போன்ற எசித்தியர் பெரும் படை, பெரிய
கடலின் இடையே அமைந்து கிடந்த வழியை அடைந்து, பெரிய கடலின்
நடுவிடத்தை அடைந்தது. அப்போது, நம்மை ஆண்டு நடத்தும்
ஆண்டவன் சொல்லிய சொற்படி, அப்பெருங் கடலின்மீது, அருவமான
வானவன் ஒருவன், அதன் பாவம் பெருங் கடலுக்கு ஒப்பானது என்று
சொல்லத் தக்க அப்படையை மதிக்க முடியாத வதைக்கு உள்ளாக்கினான்.

     உறி-'உறு' என்ற பகுதியின் இறந்த கால வினையெச்ச அளபெடை
வடிவமாகிய 'உறீஇ' என்பது, ஓசை நீளாமைப் பொருட்டு, உறி என நின்றது;
'உற்று' என்பது பொருள். அருவம்-உருவமின்மை.

     "நிகரற்ற அப்படையுழவர், படைக்கலன் ஏவித் தம் எதிரே போர்
தொடுத்தவரை யாரென்று தெரிந்து கொள்ள இயலாதவராய், தாம்
அணிந்திருந்த கவசத்தோடு மார்பையும் இழந்தனர்; வில்லோடு
அம்புகளையும் இழந்தனர்; ஒப்பற்ற போருக்குரிய கைகளையும் இழந்தனர்;
போர்க் கருவிகளால் வெட்டுண்டு கால்களையும் இழந்தனர்; கவிழ்ந்து
விழும்போதே தலைகளையும் இழந்தனர்.

     'உழவர்' ஏருழவர்க்கும் போருழவர்க்கும் பொதுப் பெயர். 'கழல்'
ஆகுபெயராகக் காலைக் குறித்தது.