"நாக நாதனை நம்பலின், நாக வாய் ஆக மாறும் என்று, ஆகமம் போன்று, நல் பாகம் மாய் விடம் மூடிய பல் கதை ஆக, மா நிலத்து அர்ச்சனை நாட்டினேன்.

      "நாக நாதனை நம்பி வழிபடுவதனால், பாம்பின் வாயில் பிறக்கும்
நஞ்சு முற்றிலும் மாறும் என்று, வேத நூல் போன்று, மாய்க்கும் நஞ்சை
நல்ல சருக்கைப் பாகில் பொதிந்து மூடிய தன்மையாய்ப் பல கதைகளும்
ஏற்படுத்தி, பெரிய நிலவுலகெங்கும் நாக வழிபாட்டை நாட்டினேன். 'வாய்'
வாயிற் பிறந்த நஞ்சுக்கு ஆகு பெயர். 'பாகம்' - பாகு: 'அம்' சாரியை
பெற்று நின்றது.

     "அவ்வுருவம் சமைத்து ஆயிரத்தைம்பத்திரண்டு ஆண்டுகள் கழிந்து,
மாண்புள்ள மன்னன் எசைக்கீயன் அவ்வழிபாடு கண்டு மனம் பொறாமல்,
தெய்வக் கோலம் பூண்ட அப்பாம்பைப் பொடித்துப் புழுதியாகச் செய்தான்.
எனினும், இவ்வுலகில் அவ்வழிபாட்டைப் பற்பலர் விடாது கொள்வாராயினர்.

     இச் செய்தி ப. ஏ., II அரசர் ஆகமம், 18 : 4 காண்க.