"கூடு உடை மாக்கள், காமம் குணம் என நாடி, நாடும் கேடு உடைக் காமம் மூடக் கெழுமிய தேவர் காமப் பீடு உடையார் என்று உன்னல், பெரும் புகழ் பெற்ற                                ஆண்மை ஈடு உடைத் தொழில் என்பாயோ?" எனத் திரங்கரன்                                முன் பாய்ந்தான்

     "உடலைக் கொண்டுள்ள மக்கள், காமத்தைக் குணமென்று தாமே
நாடுதலால், தாமே நாடும் கேடுள்ள காமம் மூடி நிறைந்து கிடந்த
தேவர்களைக் காமத்தில் பெருமை உடையோர் என்று கருதச் செய்தல்,
பெரும் புகழ் வாய்ந்த வல்லமைக்கு ஈடான செயலாகுமோ?" என்று கூறி,
திரங்கரன் சத்தனாசை நோக்கி முன்னே பாய்ந்து வந்தான்.

     மேகத்தைக் கிழித்துக் கொண்டு இடித்த இடியேறு போல, தன்
முகத்தில் நெருப்புப் புறப்படுமாறு சினந்த வேகத்தோடு, தன் கை
நகங்களைப் பிளவு கொண்ட மழுவாயுதமாகக் காட்டிச் சத்தனாசு மேல்
மோத வந்த அப் பேயை, பாம்பின் உருவம் தீட்டிய துணிக்கொடியை
உடைய பேய்க்கரசன், சினந்து முழங்கி அதட்டி, பாய்ந்து வந்த நெருப்புத்
துண்டம் போன்று பெரிய கண்களை உடைய அத்திரங்கரன் மேலே
பேசுவதையும் தடுத்து நிறுத்தினான்.