"மயக்கத்தோடு கூடி ஆசை வளருமாறு, என் ஏவலினால் கவிஞர்
தம் நூல்களில் கலந்து வைத்தவிடத்து, நாவின் நுனியில் வைத்த தேன்
எனப் போற்றப் படும் காமம் மிகுதியாகக் கலந்த பாடல்களை, புலவர்
எடுத்துச் சொல்லவும் ஏனையோர் கேட்கவும் ஏற்பாடு செய்வாய்; பாலோடு
கலந்தவிடத்து, பாலென்று கருதிப் பருகிய நஞ்சு நீக்குவதற்கு அரியதாகும்.

     "தெருவில் வந்து திரியும் புலி சீறினாலும், பழக்கத்தின் காரணமாகச்
சிறுவரும் அதற்கு அஞ்சமாட்டார். அது போலவே, ஒருவர் பாவத்தை
எடுத்துச் சொல்லவும் மற்றொருவர் அதைக் கேட்கவும் ஏற்பாடு செய்தால்,
அதன் மூலம் இருவரும் பாவத்திற்கு ஆளாவதல்லாமலும், பாவத்தைப்
பற்றிய நாணத்தையும் வென்று போக்குவாய்; நெருங்குதற்கு அரியதாகக்
கருதப்படும் பாவமும் பழக்கத்தின் காரணமாக வழக்கமாகக் கொள்ளத்தக்க
தன்மையை அடையும்.

     இரண்டாமடியில் 'அன்றியும்' என வரற் பாலது, மோனைப்
பொருட்டு 'இன்றியும்' என நின்றதேனும், இன்மைப் பொருள் கொள்ளாது,
அன்மைப் பொருளே கொள்க. 'மருவவரும்' என வேண்டியது. 'மருவரும்'
என நின்றது தொகுத்தல் விகாரம்.