பேய்கள் சூசையோடும் மரியாளோடும் போர் தொடுக்க முயன்று
தோற்றத்தைக் கூறும் பகுதி. சோகு-பேய். தோர்வை - தோல்வி.

                 பேய்களின் போர்க் கோலம்

     - விளம், - மா, தேமா, - விளம், - மா, தேமா

     மணம் மிக்க மலர்க் கோலைத் தாங்கிய சூசையும், கன்னிமையைத்
தனக்கு அழகாகக்கொண்ட துணைவியாகிய மரியாளும் நிறைந்த தவமாகிய
மதில் தளர்ந்தும், அதன் இடையே வெடிப்பு ஏற்பட்டும் தாம் மெலியுமாறு
செய்ய வேண்டி, தீமை நிறைந்த பேய்களெல்லாம் ஏழு பாவங்களுக்கு
உரிய ஏழு படையணிகளாய், போர் செய்தலைக் கருதி, பூவுலகம் மிகுந்த
நடுக்கத்தோடு கண்டு கூசத் தக்க விதமாய், நரகத்தைவிட்டு எழுந்து வந்தன.

     'கான்', கா எனவும், 'தீமை' தீ எனவும், எதுகைப் பொருட்டு, ஈறு
குறைந்து நின்றன. "ஏழு பிரதான பாவங்களாவன : ஆங்காரம், உலோபம்,
காமம், கோபம், காய்மகாரம், ஆகாரப் பொம்மல், அறத்தளர்ச்சி இவை
ஏழு என்க" என்பது பழைய உரை அடிக்குறிப்பு.