"நற்செயலை நிலைநாட்டவென்று மண்ணுலகில் குழந்தையாய்த்
தோன்றியுள்ள ஆண்டவன், இவ் வஞ்சகச் செயல் அனைத்தையும் நீங்கச்
செய்து, மக்களுக்கு இரங்க மாட்டானோ?" என்று வருந்தி, தவத்தை
விடாத நல்லவளாகிய மரியாளையும் மணமுள்ள மலர்க் கொடியைத்
தாங்கியுள்ள சூசையையும் வெல்லவென்று, கொடிய செயலைக் கருதியுள்ள
பேய்கள் நோட்டம் பார்க்கும் ஆய்வு இதுவெனக் கண்டு நகைத்தனர்.

     'கொல்' அசைநிலை.

     "மக்கள் மீது கொண்ட அருளால் அவதரித்துத் தோன்றிய
ஆண்டவனே அவனென அறியாத் தன்மையால், தம் மன இருளால்
மகிழ்ந்து, தமக்கு வெற்றி எளிதென்று கருதிய பேய்கள், பகலவனின்
தெளிந்த முகத்தெதிரே இருளே போன்று முன் நிற்க மாட்டாமல்
சிதைந்து, அச்சங்கொண்டு மெலிந்து, மயக்கங்கொண்டு மீண்டும் நரக
நெருப்பில் வீழ்ந்து ஒருங்கே கெடுவன ஆகும்" என்பார்.