"நாம் அஞ்சுவதற்குக் காரணம் யாது? அப்பக்கம் அணுக இயலாத
விதமாய் நாம் மெலிதல் எதனால்? இரந்து பிழைக்க வந்த இரு மானிடரின்
வலிமை இங்கு நமக்கு மிஞ்சுவது எதனால்? உலகத்தையெல்லாம் வென்ற
நம் வஞ்சனை அழிவதற்குக் காரணம் யாது?" என்றெல்லாம் அப்பேய்கள்
சினந்து சீறின.

     இரந்த + இரு - 'இரந்தவிரு' எனற் பாலது, 'இரந்திரு' எனத்
தொகுத்தல் விகாரமாயிற்று.

     இதனால் அதிர்ச்சி அடைந்த பின் பக்கத்துள்ள பேய்க் கூட்டம்,
மின்னலோடு கூடிய இடிபோல் முழங்கி, கண்களில் நெருப்பு எழ விட்டு,
பெரிதும் உதைத்து முன்நோக்கித் தள்ளியமையால், முன் பக்கத்துள்ள
பேய்களெல்லாம் முழங்கி, தம்மிடத்துள்ள வலிமை யெல்லாம் வீணாகி,
அப்பக்கம் முன்னேறிச் செல்ல இயலாது குலைந்து, அவ்விடத்தே நின்று
போயின.