"இருளை விரும்பிய மயக்கத்தின் திறத்தால் போரை மேற்கொள்ளும்
பேய், இரவில் பொய்யின் வல்லமையோடு பொருந்திய தீய கனவைத்
தோற்றுவித்து, இம்மண்ணவர் மெய்யின் திறத்தோடு பொருந்திய உணர்வு
நீங்குமாறு செய்து, இவ்வகையாய் அல்லவா தீமை விளைவிக்கும்?

     முன் 'பார் சிதையும்' என்றமையின், இங்கு 'அவர்' என்றது 'பார்
அவர்' என இசைந்து, மண்ணவரைக் குறிக்கும்.

     "பேய்கள், 'வழிபாடு செய்து என்னை வணங்குதல் இல்லாத போது,
நீங்கள் ஆசை வைத்துள்ள புதல்வரைக் கொன்று துன்பம் விளைவிப்பேன்;
பொன்னால் ஆகும் நலம் நீங்குமாறு உங்களுக்கு வறுமை உண்டாக்குவேன்',
என்றெல்லாம், ஒலிக்கும் கடல் போல் முழங்கிக் கனவில் உரைக்கும்.

     'கனவில்' என்பது, முந்திய பாடல் தொடர்பால் கொள்ளப்பட்டது.