சூசை இவ்வாறு நன்மையைச் சார்ந்து நின்று, மனிதர் பொருட்டு
வருந்திய பின், மேகம் போல் முழக்கொலியோடு சீறிய பேய்கள் போரில்
கெடுமாறு, வில்லின் தன்மையாகப் பெருந் தவத்தை ஏந்தி, அம்பின்
தன்மையாக அறத்தை ஏற்றித் தொடுத்தான்.

     'அம்பின் றிறத்தில்' என்பது, எதுகை ஓசைப் பொருட்டு, 'அம்பிற்
றிறத்தில்' என நின்றது. 'தொடை ஏற்றினான்' என்பதனை, 'ஏற்றித்
தொடுத்தான்' எனக் கொள்க.

     பேய்களை நடுங்கச் செய்யுமாறு, தேன் விரியும் தன் மணமலர்க்
கொடியை அசைத்த குற்றமற்ற பெருந் தவத்தோனாகிய சூசை, இவ்வுலகை
நடுங்கச் செய்த கொடிய பழியைக் கொண்டுள்ள பேய்களையெல்லாம்
அடியோடு நடுங்கச் செய்யும் வீரத்தோடு நோக்கினான்.

     'நடுக்கிய' என்பது, முதல் அடியில், 'செய்யிய' என்னும் வாய்பாட்டு
வினையெச்சமாகவும், ஏனைய அடிகளில், 'செய்த' என்னும் வாய்பாட்டுப்
பெயரெச்சமாகவும் கொள்க.