"நீ கூறிய இது வீரர்க்கு உரிய செயலோ? அச்சமுற்றுப் புன்மையைக்
கடைப்பிடிக்கும் மகளிர்க்கு உரிய செயலோ? ஈனாக்கு உரிய தொழிலை
வேதநூல் அறிந்த உயர்ந்ததோர் தொழிலெனப் போற்றி அரசியலென்று
தோன்றுமாறு சொல்லியுள்ளாய்.

      அரோ - அசைநிலை. இலா - இலாத என்பதன் ஈறுகெட்ட
எதிர்மறைப் பெயரெச்சம்.

 

53

இன்வளர் தயைமலி யிறைவ னேவலான் மின்வளர் படைமுகத் திரத்த வெள்ளமாய் முன்வளர் தகமையோர் பகைமு ருக்கியே பொன்வளர் முடிநலம் புனைவ தாயினார்.

"இன் வளர் தயை மலி இறைவன் ஏவலால் மின் வளர் படைமுகத்து இரத்த வெள்ளமாய் முன் வளர் தகமையோர் பகை முருக்கியே பொன் வளர் முடி நலம் புனைவதாயினார்.

      "அரசர் என்பார் இன்பம் வளர்தற்குக் காரணமான இரக்கம் மிகுந்த
இறைவனின் ஏவலால், தம் முன் வளர்கின்ற தக்கோரது பகையை ஒளி
பெருகுகின்ற படைக்கலத்தின் முகத்தே இரத்த வெள்ளம் பெருக அழித்து,
பொன்னாலாகிய முடியை நலத்தோடு புனைந்து ஆள்வாராயினார்.

 

54

சேய்வினை புரிவரைச் சேர்த்தி யோம்பவோர் தாய்வினை புரிதலே தரும் மாம்பகை நோய்வினை புரிவரை நூற லுங்கொடுந் தீய்வினை புரிதலோ வென்று செப்பினான்.

"சேய் வினை புரிவரைச் சேர்த்தி ஓம்ப ஓர் தாய் வினை புரிதலே தருமம் ஆம்; பகை நோய் வினை புரிவரை நூறலும் கொடுந் தீய் வினை புரிதலோ? என்று செப்பினான்.