"பக்கத்தில் எழும் மாதர்தம் அழகு நலம் தந்த இன்பத்தினால்,
அவ்விடத்தில் எழும் ஆசை வெறுப்பதற்கு அரியதாகும் என்றாய்;
பக்கத்திலே கிடைக்கும் எட்டிப் பழத்தை விரும்பி உண்டு, அங்கே
தோன்றும் துன்பம் உறுங்காலத்து வருந்த முற்படுவது ஏன்?

     பழன் - 'பழம்' என்பதன் கடைப்போலி.

 

44

நெடிதுநா ளுற்றநோய் மருந்தி னீர்மையாற் கடிதுதீர் தரலருங் கரும மாமென்றாய் நெடிதுநா ளுற்றநோய் நீள மீண்டுயிர் கடிதுமாய்ந் தொழிதரக் கடுவுண் பாவதேன்.

"நெடிது நாள் உற்ற நோய் மருந்தின் நீர்மையால் கடிது தீர் தரல் அருங் கருமம் ஆம் என்றாய்; நெடிது நாள் உற்ற நோய் நீள, மீண்டு உயிர் கடிது மாய்ந்து ஒழிதர, கடு உண்பு ஆவது ஏன்?

     "நீண்ட நாளாகக் கொண்ட நோய் மருந்தின் தன்மையால் விரைவில்
தீருதல் என்பது அரிய செயலாகும் என்றாய்; நீண்ட நாளாகக் கொண்ட
நோய் இன்னும் நீளவும், மேலும் விரைவில் உயிரே மாய்ந்து ஒழியவும்,
நஞ்சை உண்பதற்கு முற்படுவது ஏன்?

 

45

கோட்பரு மெழிலெனக் கோதை யார்முக மீட்பரும் விடமதை விழித்துய் யாரென்றாய் கோட்பரு மெழிலுயிர் குழைய நாடொறு மீட்பரும் விளிவுற விழித்த லாவதேன்.

"கோட்பு அரும் எழில் எனக் கோதையார் முகம் மீட்பு அரும் விடம்; அதை விழித்து உய்யார் என்றாய். கோட்பு அரும் எழில் உயிர் குழைய, நாள் தொறும் மீட்பு அரும் விளிவு உற, விழித்தல் ஆவது ஏன்?

     "கொள்வதற்கு அரிய அழகு என்னும் தன்மையால் மாலை போன்ற
மகளிர் முகம் மீட்பதற்கு அரிய நஞ்சு ஆகும்; அதை விழித்துப் பார்த்தவர்
உய்ய மாட்டார் என்றாய். கொள்வதற்கு அரிய அவ்வழகினால் உயிர்
குழையவும், நாள்தோறும் மீள்வதற்கு அரிய சாவை நெருங்கவும்,
அம்முகத்தை விழித்துப் பார்க்க முற்படுவது ஏன்?