"மயக்கத்தால் வளரும் காம நோய் கொணரும் போராகிய அதனை நீ
வேலால் வளர்க்கும் போருக்கு ஒப்பாக நோக்குதல் வேண்டப் படாத
ஒன்றாம். எப்படியெனில், அம்பால் வளர்க்கும் போரில் எதிர்த்து நின்று
தாக்கிய அம்பே வெற்றி கொள்ளும்; இங்குக் காமப் போரிலோ தனது கால்
வளர்க்கும் ஓட்டமே வெற்றியைக் காக்கும்.

      அம்புப் போரில் எதிர்த்து நின்று வெல்லுதலும் காமப் போரில்
ஓட்டத்தின் அளவாக வெற்றி காணுதலும் இவற்றிடையே வேற்றுமையாம்.
இதே கருத்து 4;21ல் வருவதையும் அதன் அடிக் குறிப்பையும் காண்க.

 

47

பட்டிலாக் கடையிலாப் பாவை யார்கட மட்டிலா வுறுப்பெலாம் வதைசெய் நஞ்சென்றாய் கிட்டிலாற் காண்கிலாற் கேட்கி லாலது வெட்டிலாற் கொல்லுமோ வெயில்செய் பூணினாய்.

"பட்டு இலாக் கடை இலாப் பாவையார்கள் தம் மட்டு இலா உறுப்பு எலாம் வதை செய் நஞ்சு என்றாய்; கிட்டு இலால் காண்கு இலால் கேட்கு இலால் அது வெட்டு இலால் கொல்லுமோ, வெயில் செய் பூணினாய்?

     "ஒளி செய்யும் மணிப் பூண் அணிந்தவனே, கெடாமலும், முடியாமலும்
பாவை போன்ற மகளிர் தம் உறுப்புக்கள் எல்லாம் மட்டின்றி உயிரை
வதைக்கும் நஞ்சு என்று சொன்னாய்; நெருங்குதல் இல்லாமலும், அழகைக்
காணுதல் இல்லாமலும், மொழியைக் கேட்டல் இல்லாமலும், விரும்பாமலும்
விலகியிருந்தால் அந்நஞ்சு தானே வந்து கொல்லுமோ?