"கண்ணாற் பாவஞ் செய்தோர் அஞ்சிப் பயங்கரத்து அழுந்தத் தக்க
பேய் உருவங்களைக் காணுதலும், குறையாமல் கண்ணில் நிறைந்த நீர்
வடிந்து ஓடுதலும், தூக்கங் கொள்ளாத கண்களில் தோயுமாறு பேய்கள்
நெருப்பைத் தூவுதலும் மேன்மேலும் மிகுவதனால், நிகரில்லாத கொடுமைக்கு
ஆளாகி மயங்குவர்.

 

106

நால்வ கைப்பொறி நண்ணியைந் தாம்பொறிப் பால்வ கைப்புரை விஞ்சிய பான்மையாற் சால்வ கைப்புத வெங்கணாஞ் சாற்றுரை மேல்வ கைத்துயர் மெய்த்துய ராகுமால்.

"நால் வகைப் பொறி நண்ணி, ஐந்தாம் பொறிப் பால் வகைப் புரை விஞ்சிய பான்மையால், சால் வகைப் புதவு எங்கணும் சாற்று உரை மேல் வகைத் துயர் மெய்த் துயர் ஆகும் ஆல்.

     "மூக்கு முதலாகச் சொல்லிய நான்கு வகைப் பொறிகளும்
துணையாகப் பொருந்தி, ஐந்தாம் பொறியாகிய உடலினிடத்துப் பாவ
வகைகள் மிஞ்சிக் காண்கின்ற தன்மையால், சொல்லும் உரைக்கு மேற்பட்ட
வகையாக நரகெங்கிலும் மிகுந்துள்ள பலவகைத் துயர்களும் உடலுக்கு உரிய
துயர்களாய் அமையும்.

 

107

ஈறு மொன்றில வின்னணந் தீயரே மாறு மொன்றில மாழ்கிய ழுங்குளந் தேறு மொன்றில தீக்கடன் மூழ்குவார் காறு மொன்றில வேகவெக் காலுமே.