அவன் ஆற்றுநீர் சேறுள்ள நீர், கடல் நீர் உப்புள்ளது, குளத்து நீர்
குழைவு உள்ளது என்று எல்லா வகை நீரையும் விலக்குவான்; தான் செய்யும்
நேர்மை இல்லாத வஞ்சகத்தைப் பொறுக்க இயலாதவரின் கண்கள்
பொழியும் நீர் ஒன்றே தனக்கு மகிழ்ச்சி தருவதென்று அதனில் நீராடுவான்.

     'விழி ஊற்று நீர்' என்று கொண்டு, 'கண்ணாகிய ஊற்றினின்று
பிறக்கும் நீர்' என உரைத்தலும் ஒன்று.

 

61

கின்னரம் பயிலியாழ் கிளர்பொன் மாடக வின்னரம் புளரலு மினிதன் றென்றுதன் வின்னரம் பொலிக்கனை வினையிற் கைமையார் துன்னரம் பயிலொலி சுவையென் றாவுவான்.

கின்னரம் பயில் யாழ் கிளர் பொன் மாடக இன்நரம்பு உளரலும் இனிது அன்று என்று, தன் வில் நரம்பு ஒலிக் கணை வினையின் கைமையார் துன்னரம் பயில் ஒலி சுவை என்று ஆவுவான்.

     கின்னரம் பழகிய யாழ், அழகிய பொன் முறுக்காணி கொண்ட
வீணை ஆகியவற்றின் இனியநரம்புகளைத் தடவி வாசித்தலும் இனிமை
தருவதன்று என்று கொள்வான்; தன் வில்லின் நாண் ஒலிக்கப் பாயும்
அம்பின் செயலால் விதவையான மகளிர் ஒப்பாரியில் எழுப்பும் ஒலி
சுவையானதென்று அதனையே விரும்புவான்.

     கின்னரம், யாழ், வீணை - இவை யாழின் வகைகள் என்று கொள்க
பயில் + யாழ் - பயிலியாழ்: தன்னொழிமெய் முன்யகரம் வர இகரம் தோன்றிற்று.