இசையைப் பரவவிட்டு, தம் பசுக் கூட்டங்களோடு மான் கூட்டங்கள் கலந்து
குலாவ நின்ற முல்லை நிலத்தை நோக்கிச் சென்றனர்.

 

98

கரவ நெஞ்சுணர் காமமோர் மூரலே பரவக் காட்டின பான்மையி லங்கணிற் குரவ நீண்டகு டங்கைக ரந்தபூ விரவ நக்கமுல் லைவிரை காட்டுமால்.

கரவ நெஞ்சு உணர் காமம் ஓர் மூரலே பரவக் காட்டின பான்மையில், அங்கணில் குரவம் நீண்ட குடங்கை கரந்த பூ, விரவ நக்க முல்லை, விரை காட்டும் ஆல

     மறைவாக ஒருத்தி தன் மனத்துள் உணர்ந்த காமத்தை ஒரு புன்னகை
பரவக் காட்டின தன்மை போல், பரவலாகச் சிரித்தாற் போல் மலர்ந்த
முல்லைக் கொடி, பேரீச்சையின் உள்ளங்கை போன்ற மடலுக்குள்ளே
மறைந்து கிடந்த தன் பூக்களை, அவற்றின் மணத்தால் காட்டி விடும்.

 

99

முகைய ணிந்தளி மொய்புவி கூந்தலின் வகைய ணிந்தமுல் லைப்பினர் மற்றதன் றகைய யணிந்தமு கந்தகும் யூதர்தந் திகைய ணிந்தசி லம்பெதி ரெய்தினார்.

முகை அணிந்து அளி மொய் புவி கூந்தலின் வகை அணிந்த முல்லைப் பினர், மற்று அதன் தகை அணிந்த முகம் தரும் யூதர் தம் திகை அணிந்த சிலம்பு எதிர் எய்தினார்.

     அரும்புகளை அணிந்து வண்டுகள் மொய்க்கும் நிலமகளின்
கூந்தல்போல் அழகுடன் விளங்கிய முல்லை நிலத்தைக் கடந்தபின், அதற்கு
ஏற்ப அழகுடன் விளங்கிய முகம் என்னத்தக்க யூதரின் நாட்டில் அழகுடன்
விளங்கிய மலையின் எதிரே மூவரும் சென்று சேர்ந்தனர்.

     திகை - திசை என்பதன் போலி; இங்கு நாட்டுக்கு ஆகி வந்தது.