"பாவி யாகியயான் பெற்ற மகனுக்கு உரிய இயல்பைக் கேள்: அவன்
தடாகத்தில் தோன்றிய குளிர்ந்த தாமரை மலர் போன்ற வாயை உடையவன்;
கருங்குவளை மலரின் தோற்றம் கொண்டு, காண்பவருக்குக் களிப்பூட்டும்
கண்களை உடையவன்; கேட்பவர்க்கு உயிரைத் தந்துதவும் அருள் அறாத
சொல்லை உடையவன்.

 

66

பானு யிர்த்தக தீர்ப்படப் பங்கியான் வானு யிர்த்தம திப்பட நெற்றியான் றேனு யிர்த்தமுல் லைச்சிறு மூரலான் கானு யிர்த்தம லர்முகக் காமரான்.

"பானு உயிர்த்த கதிர்ப் படப் பங்கியான்; வான் உயிர்த்த மதிப்பட நெற்றியான்; தேன் உயிர்த்த முல்லைச் சிறு மூரலான்; கான் உயிர்த்த மலர் முகக் காமரான்.

     "அவன் பகலவனிடம் தோன்றிய கதிரின் படம் என்னத்தக்க தலை
மயிரை உடையவன்; வானில் தோன்றிய இளம்பிறையின் படம் என்னத்தக்க
நெற்றியை உடையவன்; தேன் சுரந்த முல்லை அரும்பு போன்ற சிறிய
புன்னகை உடையவன்; மணம் பிறப்பித்த தாமரை மலர் போன்ற முக
அழகைக் கொண்டவன்.

 

67

பொருளில் வீங்கிய பொச்சைப்பு யத்தினா னருளில் வீங்கிய வார்கலி மார்பினான் றெருளில் வீங்கிய சீர்முகிற் கையினான் சுருளில் வீங்கிய தோடலர்த் தாளினான்.