"தாயிடம் பிறக்கும் அன்பும் ஒப்பாகாதென்று பின்னடையுமாறு,
இரக்கத்தில் மிக்க ஒரு முறையைக் கருதி, மேலுலகில் விளையும்
இன்பத்தோடு யாவரும் உண்டு வாழ வேண்டுமென்று விரும்பி, நானே
ஆன்மாவிற்கு நற்கருணை என்னும் திருவிருந்தாக அமைவேன். துன்பம்
விளைவிக்கும் நஞ்சு போன்ற தீமைகளை இன்பமென்று உட்கொண்டு,
ஆன்மா மீண்டும் பாவத்திற்கு ஆளானால், நரகை விளைவிக்கும்
அந்நோயைத் தீர்க்கும் மருந்தாக, பாவ மன்னிப்பு என்னும் சிறந்த ஒரு
தெய்வ முறையை அமைப்பேன்.

     'வாழ்ந்து உண' என்பதனை, 'உண்டு வாழ' என மாற்றிப் பொருள்
கொள்க. 'மிக்கவோர்' 'சிறந்தவோர்' என்பன, தொகுத்தல் விகாரமாய்,
'மிக்கோர்' 'சிறந்தோர்' என நின்றன. மீ, தீ என்பன எதுகை நோக்கி, மீய்,
தீய் என விரித்தல் விகாரம் பெற்றன.