சிலர் மின்னலின் நிறமுள்ள வடிவத்தையும், சிலர் விரிந்த ஒளியை
வீசிய பொன்னின் நிறமுள்ள உருவத்தையும், சிலர் தீப்பொறி பறக்கும் தூய
நெருப்பின் நல்ல நிறமுள்ள உருவத்தையும், சிலர் அன்று அலர்ந்த புதிய
மலரின் இனிய நிறமுள்ள உருவத்தையும் கொண்டு செல்வர்.

 

63

தோட்டழ கலர்ந்தபூந் தொடைதொ டுத்தொளி தீட்டழ கமர்ந்தபூண் டியங்கிச் செஞ்சுடர் காட்டழ குருக்கொடு கலந்தன் னாருடன் வீட்டழ கரிவையர் விளங்கக் கண்டுளான்.

தோட்டு அழகு அலர்ந்த பூந் தொடை தொடுத்து, ஒளி தீட்டு அழகு அமர்ந்த பூண் தியங்கி, செஞ் சுடர் காட்டு அழகு உருக் கொடு, கலந்து அன்னாருடன், வீட்டு அழகு அரிவையர் விளங்கக் கண்டு உளான்.

     இதழ்களின் அழகோடு மலர்ந்த பூக்களால் தொடுத்த மாலை
அணிந்து, ஒளி கொண்டு தீட்டியது போன்ற அழகு பொருந்திய
அணிகளோடு விளங்கி, கதிரவனைக் காட்டுவது போன்ற அழகிய வடிவு
கொண்டு, முற்கூறிய ஆடவரோடு தாமும் கலந்து, வீட்டிற்கு அழகாக
அமையும் மகளிரும் விளங்கித் தோன்றக் காணலானான் சூசை.