கண்ணைத் தருவான்; கையைத் தருவான்; நடந்து செல்லக் காலைத்
தருவான்; உணவு தருவான்; மகிழ்ச்சி தருவான்; உயிர் தருவான்;
மதிக்கத்தக்க பழமை வாய்ந்த அரிய துயர்கள் நோய்கள் பலவற்றையும்
தீர்த்துத் தருவான்; இவ்வாறு, தன்னிடம் செறிந்து கிடந்த அரிய தயை
நலத்தை மக்களுக்கு வழங்கும் ஆற்றலைச் சீடருக்குக் கொடுத்துள்ளான்.

 

15

தந்தநன் றெவர்க்குமாய்த் தனக்கி யாவரு மந்தமொன் றிலாமலி யல்ல லாக்கலும் வந்ததன் றுயரெலா மனத்தெண் ணாப்பொறைக் கந்தளந் தரித்தனன் கருணை வேலையான்.

தந்த நன்று எவர்க்கும் ஆய் தனக்கு யாவரும் அந்தம் ஒன்று இலா மலி அல்லல் ஆக்கலும், வந்த தன் துயர் எலாம் மனத்து எண்ணாப் பொறைக் கந்தளம் தரித்தனன், கருணை வேலையான்.

     கருணைக் கடலாகிய அவ்வாண்டவன், தான் தந்த நன்மைகளை
யாவருக்கும் உரிமையாக்கி, யாவரும் தனக்கு முடிவு ஒன்றுமில்லாத மிகுந்த
துன்பங்களைச் செய்தவிடத்தும், அவற்றால் தனக்கு வந்த
துயரங்களையெல்லாம் மனத்தில் எண்ணாத பொறுமையென்னும் கவசத்தை
அணிந்துள்ளான்.

 

16

புரைசெயுந் தன்றுயர் பொறுத்து நொந்திலா னுரைசெயு நெறியுறா வுயிரைத் தீநர கிரைசெயும் பாவமென் றிரங்கி விம்முவான் கரைசெயுங் கடலிணை கடந்த வன்பினான்.

புரை செயும் தன் துயர் பொறுத்து, நொந்து இலான்; உரை செயும் நெறி உறா உயிரைத் தீ நரகு இரை செயும், பாவம், என்று இரங்கி விம்முவான், கரை செயும் கடல் இணை கடந்த அன்பினான்.