அக்காட்சியைப் பெற்றபோது, அப்பாதலத்தார், மகிழ்ச்சி நிறைந்த
தம் உள்ளத்தில் அடங்காத மாட்சியை அடைந்து, அரிய வரத்தால் கிட்டிய
உணர்வையும் அடைந்து, அத்திருமகனின் அடியைக் கூட்டங் கூட்டமாய்
வணங்கவே, வானுலக ஆட்சியை அடைந்து, ஒளியை அடைந்து,
அருளையும் பெற்றனர்.

 

31

பணிந்தனர்பு கழ்ந்தனர்ப தந்தனிலு யர்ந்தே தணிந்தனர்த ணிந்திலந லங்களிற யங்கத் துணிந்தனர்து ளங்கினர்து தைந்தனந யங்க ளணிந்தனரருந்துதிய விழ்ந்தனரொ ருங்கே.

பணிந்தனர்; புகழ்ந்தனர்; பதம் தனில் உயர்ந்தே தணிந்தனர்; தணிந்து இல நலங்களில் தயங்கத் துணிந்தனர்; துளங்கினர்; துதைந்தன நயங்கள் அணிந்தனர்; அருந்துதி அவிழ்ந்தனர் ஒருங்கே.

     அவர்கள் திருமகனை வணங்கினர்; போற்றினர்; அவன் அடிகளில்
எழுச்சியோடு விழுந்தனர்; தணியாத நலங்களால் விளங்கவே துணிவு
கொண்டனர்; ஒளியால் விளங்கினர்; தோய்ந்த இன்பங்களை அணியாகக்
கொண்டனர்; ஒருங்கே அரிய வாழ்த்துக்களால் தம் வாய் மலர்ந்தனர்.