'எழீஇ' என்பது 'எழுந்து' என்பதின் சொல்லிசை அளபெடை.

 

20

மன்னா வின்ப வினையாற்றா      மக்கட் கிரங்கி மகனானே னன்னார் வாழ வுயிர்நொந்தே      னயர்ந்தே னிந்தை பட்டிறந்தேன் முன்னாட் பிதாநீ பணித்ததெலா      முடித்தேன் பகைப்பேய் வென்றேன் வென் றின்னார்க் கொணர்ந்தீங் காண்டுவப்ப      விதோமீட் டின்றுள் னடிசேர்த்தேன்

"மன்னா இன்ப வினை ஆற்றா மக்கட்கு இரங்கி மகன் ஆனேன். அன்னார் வாழ உயிர் நொந்தேன்; அயர்ந்தேன்; நிந்தை பட்டு                          இறந்தேன். முன் நாள் பிதாநீ பணித்தது எலாம் முடித்தேன், பகைப் பேய்                          வென்றேன். வென்று, இன்னார்க் கொணர்ந்து, ஈங்கு ஆண்டு உவப்ப, இதோ, மீட்டு,                          இன்று உன் அடி சேர்த்தேன்.

     நிலையாத இன்பத்தை நாடிச் செய்த தீவினையைப் போக்க இயலாத
மக்கள் மீது இரக்கங் கொண்டு நானே மனிதன் ஆனேன். அவர்கள்
வாழும் பொருட்டு நான் உயிர் நொந்தேன்; துன்பத்தால் தளர்ந்தேன்,
இகழ்ச்சி கொண்டு இறந்தேன். முன் நாளில் தந்தையாகிய நீ எனக்குக்
கட்டளையிட்டதெல்லாம் முடித்தேன். பகையாகிய பேயை வென்றேன்.
வென்று, இதோ, இவர்களை யெல்லாம் மீட்டுக் கொணர்ந்து, இங்கே
ஆண்டு கொண்டிருந்து மகிழுமாறு, இன்று உன் அடிகளிற் சேர்ந்தேன்.

 

21

நமரென் றிரங்கி யன்புகமிக      நான்மீட் டளித்த நரர்குலமே நுமரென் றிரங்கி யருணோக்காய்      நூறாப் பழிப்பே யக்குலத்தார்