அணிந்திருந்த குளிர்ந்த மாலைகளினின்று மணம் பொழியும் தேன்
துளிகளும், வானத்து மழைத் தாரை போல் யானைகள் சொரியும் மதநீரும்
ஒன்றாகச் சேர்ந்து, சேணத்தோடு தாவிப்பாயும் வலிய குதிரைகளின்
குளம்புகள் பதியக் கொண்டு எழுந்த தூசிக் குவியலை அமர்த்தின.

 

68

மலைநே ரிரதம் வளிநேர் பரிவான் கலைநேர் குடைவான் கனநேர் கரிநீ ரலை நே ரபய ரடிநேர் தொழுதே நிலைநேர் வலிநே ரரசண் டினரால்.

மலை நேர் இரதம், வளி நேர் பரி, வான் கலை நேர் குடை, வான் கனம் நேர் கரி, நீர் அலை நேர் அபயர் அடி நேர் தொழுதே, நிலை நேர் வலி நேர் அரசு அண்டினர் ஆல்.

     மலை போன்ற தேர்களும், விரைவிற் காற்றையொத்த குதிரைகளும்,
வானத்து நிலவைப் போன்ற குடைகளும், வான் மேகம் போன்ற
யானைகளும் கொண்டு, அலைநீர்க் கடலைப் போன்ற வீரர் அவன் அடியே
நேரே தொழுது, நிலையிலும் வலியிலும் தனக்குத் தானே நிகரான அரசனை
அண்டினர்.

 

69

பரிபூட் டியதேர் பலவே றரசர் கரிபூட் டியதேர் கடிதோட் டரச ரெரிபூட் டியதேர் மிசையெய் தரச ரரிபூட் டியதே ரரசண் டினரால்.