வானுலகில் விளங்கிய பகலவனை அணுகி, ஒளி விளங்கும்
விண்மீன்கள் அடிபணிந்ததுபோல, மண்ணுலகின் எல்லா முடி மன்னரும்
வந்து, எட்டுத் திசைகளிலும் நின்று அம்மன்னனைப் போற்றினர்.

 

72

அன்னா ரவையா ரணரா ரவைமெய் மன்னா ரவைமந் திரிமா ரவைமற் றொன்னார் தொழு மோங் கயிலோங் கவைசூழ் பொன்னா ரடிபொற் புறநண் ணினரே.

அன்னார் அவை, ஆரணர் ஆர் அவை, மெய் மன்னார் அவை, மந்திரிமார் அவை, மற்று ஒன்னார் தொழும் ஓங்கு அயில் ஓங்கு அவை, சூழ் பொன் ஆர் அடி பொற்பு உற நண்ணினரே.

     அம்மன்னர் கூட்டமும், வேதியர் நிறைந்த கூட்டமும், உடலைச்
சார்ந்து வாழாத முனிவர் கூட்டமும், அமைச்சர் கூட்டமும், மற்றும் பகைவர்
அஞ்சித் தொழும் உயர்ந்த வேல் ஏந்திய வீரர் பெருங் கூட்டமும், அவனது
பொன்னணி நிறைந்த அடி மேலும் அழகுறுமாறு சுற்றிலும் அணுகினர்.

 

73

வயிர்செய் யொலிமற் றொலிமா றியயின் செயிர்செய் பகைதீர்த் தசிறந் தமுகத் தயிர்செய் யினிதோ ருரையாய்ந் தறைவா னுயிர்செய் யமிர்தேந் தியமார் புரியோன்.

வயிர் செய் ஒலி மற்று ஒலி மாறிய பின், செயிர் செய் பகை தீர்த்த சிறந்த முகத்து, அயிர் செயிர் இனிது ஓர் உரை ஆய்ந்து அறைவான், உயிர் செய் அமிர்து ஏந்திய மார்பு உரியோன் :

     ஊதுகொம்பு எழுப்பும் ஒலியும் மற்ற ஒலிகளும் அமர்ந்த பின்,
உயிரைக் காக்கும் அமுதத்தைத் தாங்கிய மார்புக்கு உரியவனாகிய
அம்மன்னன், பாவம் பயக்கும் பகையைப் போக்கிய சிறந்த முகத்தோடு,
யாவர்க்கும் இன்பம் தரும் இனியதோர் உரையை ஆராய்ந்து கண்டு,
பின்வருமாறு சொல்வான் :