(இ - ள்.) எம்பெருமான் திருத்தணிகை மலையினை எய்திய வளவிலே நூறாயிரத்தொன்பதின்மராகிய வீரரும் போரினைப் பொருளாக மதியாத வலிமைமிக்க படைத்தலைவரும் பகைவர் சோர்வின்கண் அவரை யணுகாத வெற்றியையுடைய சிவகணப்படைஞரும் இன்னோரன்ன பிறர் யாவரும் நலம்பெறற் பொருட்டு வந்தனர். பெருமான் திருவடிகளை வணங்கினர்.

(வி - ம்.) இலக்கம் - நூறாயிரம். இகல் - போர். எறுழ் - வலிமை. விறல் - வெற்றி; வலிமையுமாம்.

(640)

(இ - ள்.) திருவருட் செல்வனாகிய முருகப்பெருமான் அவ்வமரரைப் பொது நோக்கானன்றி வரிசையாற் கடைக்கண்ணால் நோக்கிப் பின் அழகுமிக்க கோபுரத்தையுடைய அழகிய வாயிலிற் புகுந்து வெருட்சிமிக்க மானினது விழிபோன்ற விழிகளையுடைய வள்ளி நாயகியாரோடு செல்வமிக்க பொன் கோயிலினகத்தே சென்றருளினன்.

(வி - ம்.) அமைவர - அமைதியுண்டாகும்படி. உரு - அழகு. வாய்தல் - வாயில். வெரு - வெருட்சி.

(641)

(இ - ள்.) தாமரை மலர் போன்ற கண்ணையுடையோய்! யான் வேங்கை மரமானதும் முதியவனாகி நின்னைப் பின் தொடர்ந்ததும் யானை அழைத்ததுமாகிய நினக்கு மருட்கை விளைத்த செயலனைத்தும் யாம் இங்கே வருதற் பொருட்டன்றோ என்று கூறி மலைநிலத்துத் தெய்வமாகிய முருகவேள் அவளோடு அளவளாவி இனிதே வீற்றிருந்தருளினன்.

(வி - ம்.) வேங்கை - ஒரு மரம். விம்மிதம் - மருட்கை. போதர - வர. உடங்கு - ஒருங்கு.

(642)