பெரிய மயிலூர்தியைச் செலுத்திய முருகப்பெருமான் திருமண வினைக்கு ஏற்ற இடமமைந்த மண்டபம் இயற்றத் தொடங்கினன்.

(வி - ம்.) தாங்குபு - தாங்கி. தடவு - வளைவு. தடவிய - வளைந்த ; வணங்கிய என்றவாறு. இடவிய - இடமான.

(9)

(இ - ள்.) நில முதலிய ஐம்பெரும் பூதங்களும் நிரல்பட நின்றாற் போன்று பசிய பொன்னின்மேல் வைரமணியைப் பதித்து அதன் மேலிடப்பட்ட சிவந்த பவளத்தின்மேல் அழுத்திய நீல மணியின் உச்சியில் வெண்ணிறத்தாலே ஒளிர்கின்ற பளிக்குக்குறடு அமைத்தனன்.

(வி - ம்.) பூதம் - நில முதலியன. வச்சிரம் - வைரமணி. நீலமணி - நீல்மணி என நின்றது பளிங்கு - படிகமணி.

(10)

(இ - ள்.) வயிடூரிய மணியால் ஆயிரந்தூண்களை இயற்றி அமைத்துப் பொருந்திய கோமேதக மணியாலியற்றிய போதிகைகளை அவற்றின்மேல் பொருந்தப் பரவிய வுத்திரங்கள் புட்பராகமணியானே இயற்றி மேலே உயர்ந்த முகட்டின்கண் மாணிக்கம் வேய்ந்தான்.

(வி - ம்.) ஆக்குடி - ஆக்கி. மீ - மேலே.

(11)

(இ - ள்.) சூழமரகதமணியாலாய கொடுங்கைகளைப் பொருந்த அமைத்து வைத்தான் ; அக்கொடுங்கையினின்றும் நாலும்படி முத்து மாலைகளைத் தூக்கினான். அவற்றின் பக்கத்தே வெள்ளியாலியன்ற யாளிகளை இருத்திப் புகழப்படுகின்ற பல்வேறு மணிகளழுத்தப்பட்ட படிக்கட்டுகளைச் செருகினன்.

(வி - ம்.) தரளம் - முத்து. இரசதம் - வெள்ளி. சோபானம் - படி.

(12)