(இ - ள்.) வானத்தே ஓரிடத்தே நிறுத்திப் பின் கீழே யிறக்கிய வானவூர்தியினின்று மிறங்கித் திருக்கோயிலினுட் சென்று தங்கொழுநனை வணங்கினர் ; உவகையாலே விழிகளிற் பெருகிய நீரை யுகுத்தனர், அதுகண்ட பெருமான் அப் பெருமாட்டியார்க்குத் திருவருட் பார்வை நல்கித் தன் இடப்பாகத்தே அமர்த்த அப்பெருமானோடு இனிது அளவளாவி யிருப்பாராயினர்.

(வி - ம்.) உத்தன் - உரியவன் ; கொழுநன். அண்ணல் - முருகவேள்.

(67)

வேறு

(இ - ள்.) திருமணமுடங்கல் வர ஏற்றுக்கொண்ட வைரவனும் ; தக்கனுடைய வேள்வியைத் துகள் படுத்திய புகழையுடைய வீரபத்திரனும், தூய மதயானையை விரையச் செலுத்தா நின்ற ஐயனாரும், என்னும் இவர்களும் இவருடைய பரிவாரங்கள் பலவும் செறிந்து வந்து அடைந்தனர்.

(வி - ம்.) மறையாகிய ஞாளி என்க. ஞாளி - நாய். மகம் - தக்கன் வேள்வி. சாத்தன் - ஐயன், அரிகரபுத்திரன்.

(68)

(இ - ள்.) பாதலவுருத்திரர் மூவரும் பதுமாசுரனைக் கொன்றருளிய ஐவரும் இருமூவருமாகிய பதினோரு உருத்திரர்களும் இவர் மக்களும் பன்னிரு ஆதித்தரும் தேவமருத்துவரிருவரும் வசுக்கள் எண்மரும் சான்றோர்களாற் கூறப்படும் பதினெண்கணத்தவரும் முனிவர்களும் ஆகிய இவரெல்லாம் வந்துசேர்ந்தனர்.

(வி - ம்.) பதுமத்தோன் - பதுமாசுரன். ஐவர் இருமூவர் - பதினோருருத்திரர். ஆதவர் - ஆதித்தர்.

(69)