(இ - ள்.) தேவர்களுடைய முடியில் ஒளிராநின்ற பலவாகிய சிறந்த மணிகளுள் வைத்து உதிர்ந்தவை மாந்தர் அடிகளிலே மிதிபடுதலானே ஒளிமழுங்க அத்தேவருடனே கூடிய ஐந்தருக்களும் சிந்திய தேன் அவற்றை எஞ்சாமல் வரன்றிக்கொண்டுபோய் அத்தேவரோடு உறவுண்மை கருதிக் கரிய கடலிலேயிட்டுத் தூய்மை செய்தது.

முடியினின்றும் உக்க மணி என்க. தாரு - ஐந்தருக்கள். மரீஇய - மருவிய.

(103)

(இ - ள்.) உயர்ந்த அணிகலக் குவியல்கள் குன்றுகளாகவும், நெய் பால் தயிர் முதலிய ஒழுகுவன காட்டாறாகவும், சிந்திய சந்தனஞ் சேறாகவும், விளங்காநின்ற மணிச்சுண்ணம் மெல்லிய மணற் குன்றுகளாகவும் தோன்றுதலானே ஒன்பதுவகை மணிகளையுமுடைய வீதிகள் தம்பால் குறிஞ்சி முல்லை மருதம் நெய்தல் என்னும் நான்கு வகைப்பட்ட நிலங்களின் வளத்தையெல்லாம் காட்டுவனவாயின.

(வி - ம்.) குன்று குறிஞ்சிவளம். கானாறு - முல்லைவளம், சேறு - மருதவளம். மணற்பிறக்கம் - நெய்தல். அயிர் - மணல்.

(104)

(இ - ள்.) இனிய முறுவலையுடைய மகளிர் பொன்னானும் மணியினானும் பொலிவுறச் செய்தணிந்து பின் வெறுத்து நீத்த பொற்றாமரை மலரும் மின்போன்று விளங்குஞ் செங்கழுநீர் மலரும் சந்தனக் குழம்பும் இருவேரியும் செறிந்துகிடக்கின்ற வீதிகள் நீரோடைபோன்று காணப்பட்டன.

(வி - ம்.) வேரி - வெட்டிவேர். இது பாசிக்குவமை.

(105)

(இ - ள்.) மகளிருடைய செம்பஞ்சுக் குழம்பூட்டப் பெற்ற அடிச்சுவடு மிகவும் பொருந்தப்பட்டு குங்குமமும் யாண்டும் பரவி