வேறு

(இ - ள்.) திருவுலாக் காட்சியைக் கண்டோர் சிலர் குடங்களிலே குளிர்ந்த நறிய நீரை முகந்து கொடுபோய் பெருமான் ஊர்ந்து வரும் பெரிய களிற்றியானையின் அடிகளிலே வாக்கிப் பின் மலர்மாலையும் மணங்கமழாநின்ற கலவைச்சாந்தமும் செழிப்புடைய பொற்சுண்ணமும் சொரிந்து வணங்காநின்றனர்.

(வி - ம்.) தசும்பு - குடம். அண்ணல் சிறப்பெனக் கொண்டு களிற்றிற் கடையாக்கினுமாம்.

(207)

(இ - ள்.) சிலமகளிர் தம் முகத்திலே சுரவாநின்ற சுடரினைக் கவர்ந்து கொண்டு விண்ணிடத்தே சென்று மறையா நின்ற கதிரவனைக் கரைத்து மற்றையோர்க்குக் காட்டினாற்போன்று, அரக்குநீர் நிரப்பிய கலத்தினுட் கையிட்டுச் சுழற்றி நிலத்தின்மேற் பரவுமாறு பாய்ச்சா நின்றனர்.

(வி - ம்.) கதிரவன் நிழலுருவம் கலத்துட் டோன்றலின் அவ் உருவத்தைக் கரைத்தாற்போலக் கையானீரைச் சுற்றினர் என்பது கருத்து. கதிரவனைக் கரைத்தற்கு ஏது அவன் தம்முகச் சுடரைக் கவர்ந்தமை.

(208)

(இ - ள்.) வேறு சிலமகளிர், தம்முடைய பெரிய வளைந்த நெற்றியினைப் போலவாதல் வேண்டித் தேயாநின்ற முழுத்திங்களின் கலைகளை முறித்து முறித்து, அத்திங்களை அவாவும் பாம்புக்கோள்களுக்குத் தெரிவித்தாற்போன்று பொரியினைக் கையகத்திட்டு இட்டுச் சிதறினார்.

(வி - ம்.) பொரி நிரப்பிய வட்டில் முழுத்திங்கட்குவமை. பிடி பிடியாய் அள்ளுதல் திங்களின் கலைகளை முறித்தற்குவமை. முறித்தற்குக் காரணம் தந்நுதலை ஒத்தற்குத் தேய்தல்.

(209)