விடையருள் படலம்

(இ - ள்.) என்நெஞ்சம், தாமரை குவளை ஆம்பல் முல்லை சண்பகம் காந்தள் என்னும் நீர்ப்பூ நிலப்பூக் கோட்டுப்பூக் கொடிப்பூவாகிய நான்கு வகைப்பட்ட மலர்களும் மலர்ந்து திகழாநின்ற பலவாகிய மணிகளையும் அரும்பிப் பொன்னொளியோடு செழித்து வளர்கின்ற விரும்புதற்குக் காரணமான இரண்டு தெய்வக் கொடிகளோடு தழைத்துள்ள கற்பக மரம்போன்று தான் மணந்துகொண்ட தேன்மருவிய கூந்தலையுடைய வள்ளியம்மையாரோடும் தேவசேனையோடும் வீற்றிராநின்ற முருகப்பெருமான் எழுந்தருளிய இருக்கையே ஆயிற்று.

(வி - ம்.) என் உளம் வரதன் சேக்கையாயொழிந்தது, என்க.

(1)

வேறு

(இ - ள்.) மின்னா நின்ற வேலின் வெற்றியையுடைய எம்பெருமான், பொன்னணிகலன் அணிந்த முலையையுடைய வள்ளிநாயகியாரோடு மலர்செறிந்த படுக்கையின்கண் கலவித் திருவிளையாட னிகழ்த்திய அற்றை நாளிரவின் வைகறைப் பொழுதிலே எழுந்தருளிப் பலரும் நெருங்கும்படி ஒப்பற்ற திருமணத்தை நிகழ்த்திய மண்டபத்தினின்றும் புறப்பட்டு, தான் வீற்றிருந்து அருளாட்சி புரிதற்கிடமான பழைய திருக்கோயிலை எய்தி நிலைபெற்ற தன்னுடைய இருமருங்கும் வள்ளிநாயகியும் தேவசேனையும் அமர்ந்திருப்ப மெல்லிய மலரணைமேல்
வீற்றிருந்தருளினன்.