(இ - ள்.) இவ்வாறு இருவரும் மகிழ்ச்சி பெருக அளவளாவிய பின்னர், மணம்வளரும் மலரணிந்த கூந்தலையுடைய குறமகளார், தேன் மிக்க கடப்பமலர் மாலையணிந்த பெருமான் திருவடிகளை வணங்கிப் பெருமானே ! துறக்கத்தை ஒத்த இந்தத் திருத்தணிகை மலையினது மாண்பினை திருவாய் மலர்ந்தருள்க என்று வேண்டினர்.

(வி - ம்.) ஆனந்தம் - இன்பம். கான் - மணம் - காடுமாம். நந்துதல் - மிகுதல். வானந்து - என்புழி, நந்து : உவமவுருபு. வாய்மை - மாண்பின்
மேனின்றது.

(29)

வேறு

(இ - ள்.) அசுரர்களாற்றுன்பமடைந்து மெலிந்த அமரர்களுடைய வலிய சிறையை வீடுசெய்த வேற்படையினையுடைய ஆறுமுகப் பெருமான் அங்ஙனம் வினவிய வள்ளியை நோக்கிச் செவ்வரியோடிய கரிய குளிர்ந்த மையுண்ட கண்ணையுடையோய் இம்மலைமாண்பினைக் கூறுவேம் கேட்பாயாக என்று
கூறத்தொடங்கினன்.

(வி - ம்.) மா - கரிய. மழையுண்கண் : உவமத்தொகை. பாடுதும் - கூறுவேம்.

(30)

(இ - ள்.) இந்தத் திருத்தணிகைமலை வளமிக்க காஞ்சிநகரத் தெல்லையுள் இருத்தலான் தலைமைத் தன்மையுடைய அக்காஞ்சி முத்தி நகர் ஏழனுள்ளும் புகழோடு சிறந்துயர்ந்ததாயிற்று.

(வி - ம்.) காஞ்சி தன் வைப்பிடை இந்த அடுக்கல் அளவலின் ஐநகர் ஏழுளும் காஞ்சி உயர்வுற்றது என்க. ஐ - தலைமைத் தன்மை

(31)