(இ - ள்.) அத்தகைய தொரு திருமாலூழி முடிவு வந்தெய்திய பொழுது உலகம் அனைத்தும் அழியா நின்ற பேரழிவினைக் கண்ணுற்ற அறக்கடவுள் இப்படிப்பட்டதொரு அழிவு நமக்கும் வந்தெய்துதல் ஒரு தலை என்று கருதி, (அதற்குப் பாதுகாப்பாகிய புகலிடத்தைப் பெற விரும்பி) காண்போர் நெஞ்சம் விரும்புதற்குரிய அழகுடைய ஆனேற்றுருவங்கொண்டு சிவபெருமான் திருமுன்சென்று அடைக்கலம் புக்கு வணங்கா நிற்ப அப்பெருமான் அபயமளித்துத் தன்னைச் சுமக்கும் பேராற்றலை முதற்கட் கொடுத்துத் தனக்கு ஊர்தியாக்கிக் கொண்டனன். இனிச் சிவபெருமான் முப்புரத்தை எரித்தருளிய காலத்திலே அப்பெருமானுடைய திருவருட்கிலக்காகும் பொருட்டுத் திருமாலும் ஆனேறாகி அப்பெருமானைச் சுமந்தனன் இதனையும் உணர்வாயாக,

(வி - ம்.) இவ்வாறாக இறைவன் ஏறுகந்தான் காண் என்றவாறு.

(40)

(இ - ள்.) இனிப் பிறவாயாக்கைப் பெரியோனாகிய சிவபெருமான் ஆரவாரமுடைய அப்பேரூழியின் தீயானது அழித்தலானே இறந்துபட்ட தேவர்களுடைய கொழுவிய உடல் நீற்ற வெண்ணீற்றினையும் அவரது வெள்ளிய விளக்கமுடைய தலைகளையும் என்புகளையும் அணிந்து கொண்டனன். எற்றுக் கணிந்தானெனின், தமது இயற்கை அருட்டிரு மேனியினுடைய அழிவில்லாத் தன்மையினையும் குற்றமுடைய பிற தேவருடைய செயற்கை உடலங்களின் அழிவுத் தன்மையையும் உயிரினங்கள் ஐயந்திரிபற உணர்ந்து கொண்டு ஒப்பற்ற முழு முதல்வன் சத்தியைத் தன்னிடத்தே கொண்ட சிவபெருமானே என்று மெய்யுணர்ந்து தன் திருவடிகளை நினைத்து வீடுபேறெய்தும் பொருட்டேயா மென்றுணர்க.

(வி - ம்.) குரையெரி - ஆரவாரமுடைய நெருப்பு. கோழ் - கொழுவிய. நரை நகுதலை - வினைத்தொகையடுக்கு. நரைத்தலை, நக்கதலை என்க.

(41)