(இ - ள்.) ஒருசேர உலகமனைத்தையும் வென்று தன்னடியின்கீழ்ப் படுத்து வெற்றியாலோங்கிய இரணியனுடைய உயிரைப் பருகிய நரசிங்க மாகிய திருமால் பின்னர்ச் செருக்குற்று மிகுந்த உயிரினங்களைக் கொல்லா நிற்புழிச் சிவபெருமான் வலிய சிறகினையுடைய சிம்புளாகி அச்சிங்கத்தைத் தாக்கிப் பெரிதும் அகத்தே செருக்குடைய அந்நரசிங்கத்தின் தலையைத் தன் தலைமேலணிந்த பிரமன்றலைமேலே சுமத்தித் தாங்கி, அச்சிங்கத்தின் தோலைப் பெரிய தனது ஒளியுடைய தோளின் மேல் மேலாடையாய் வீக்கியருளினன்.

(வி - ம்.) மடங்கல் - நரசிங்கம். சுமாய் - சுமத்தி. உத்தராசங்கம் - மேலாடை.

(48)

(இ - ள்.) இனி ஒருகாலத்தே கயமுகாசூரன் எல்லாவுலகங்களையும் அழித்துக் காசிமா நகரத்திலே மறைந்துறைந்த தேவர்களையும் தாக்குதற்கு அங்கே வந்தபொழுது அவ்வசுரர் முன்னர் எம்பெருமான் செறிந்த பேரொளிப் பிழம்பாகியதொரு வடிவங்கொண்டு மேன்மை திகழ நின்று அவ்வசுரனுடைய பெரிய உருவத்தைக் கிழித்துத் தூக்கிப் போர் செய்த அத்திருவுருவத்தை நோக்க வியலாமல் முனிவர் முதலியோர் வருந்தா நிற்ப, அவ்வருத்தந் தீர்தற்பொருட்டு எம்பெருமான் கிழித்த அக்கயமுகாசூரன் உடலைப் போர்வையாகப் போர்த்து அப் பேரொளியை மறைத்தருளினன்.

(வி - ம்.) காதி - அழித்து. கடவுளர் - தேவர். அமர்த்த - பொருத, படாம் - போர்வை.

(49)