(இ - ள்.) என்று இவ்வாறு சூதமுனிவன் செவியுறுத்தருளினனாக ; இவற்றைக் கூர்ந்து கேட்ட பெரிய தவத்தையுடைய முனிவர் அனைவரும் அம்முனிவனை வணங்கிய பின்னர் வேள்வியியற்றி அத்தொழில் நன்கு முற்றிய பின்னர் நன்மையுடைய திருத்தணிகை மலையினை எய்தி வெற்றிவேலை ஏந்திய முருகப்பெருமானை வணங்கி இன்பம் விளைக்கும் தவத் தொழிலை
ஆற்றியிருந்தனர்.

(வி - ம்.) நன்று - பெரிது. இன்பவிளைவு - தவத்தொழில்.

(79)

வேறு

(இ - ள்.) தாமரை மலரிலே வீற்றிரா நின்ற நான்கு முகங்களை யுடைய பிரமதேவனுடைய படைத்தற்றொழிலும் கௌத்துவ மணியணிந்த மார்பையுடைய திருமாலுடைய காவற்றொழிலும் கடவுட் டன்மையுடைய தேன் பொருந்திய நறிய கொன்றை மாலையணிந்த சிவபெருமானுடைய அழித்தற்றொழிலும், ஆகிய இம் முப்பெருங் கடவுளர் செயலும், தூய்மையுடையவரின் நாவிலே பொருந்தா நின்ற செழிப்புடைய வேதங்களும் சிவாகமுமாகிய அனைத்தையும் செவியறிவுறுத்தவருடைய நல்ல அருட்செயலும் ஆகிய எல்லாச்செயற்கும் முதல்வன் தானேயாய் அவரவராகி இயற்றியருளா நின்ற ஒப்பற்ற முழு முதல்வனுடைய திருவடிகளை வணங்குவேம்.

(வி - ம்.) பூ - தாமரைப்பூ. மணி - கௌத்துவ மணி. புரப்பு - காவல். தேம் - தேன். கடுக்கை - கொன்றை.

(80)