கைலையின்கண் இளங்கதிரோடுகூடிய பற்பல சூரியர்கள் வலிகொள்ளத் திரண்டாற்போல மிக்க ஒளியோடு கூடிய ஆயிரந் தூண்கள் நெருங்கப் பெற்று இரத்தினமாலைகள் அசைகின்ற மின்னலென்று சொல்லும்படி தூங்கி யசைதலுற்று மிக்க அழகு பொருந்திய மண்டபத்தின் நடுவே.

(வி - ம்.) மாதர் - காதல்; "மாதர்காதல்" என்னும் தொல்காப்பியச் சூத்திரத்தானுணர்க. எறுழ் - வலி. "இஞ்சியே புரிசையிஞ்சி யெறுழென்ப வலிதண்டாமே" என்னும் நிகண்டா னறிக' விறந்து - நெருங்கி. நாலல் - தொங்குதல்.

(14)

(இ - ள்.) ஒளி திரட்சியுற்ற மாலையும், மீக்கோளும், மேலாடையு மாகிய களிப்புத் திரண்ட தங்க ளினமாகிய பாம்பு, யானை, சிங்கமா மிவைகளைப்போலத் தாங்களும் முத்தியடையக் குறிக்கொண்டு அவ்விடத்து அருள்திரண்ட பாதமாகிய தாமரையின் நீழல் (தியானித்தலால்) உள்ளத்தினும் (தாங்குதலாற்) புறத்தினும் போர்ப்பத் தெளிவு விளங்கிய பாம்பும், யானையும், சிங்கமும் நெருங்கித் தாங்கிய அணையின் மேல்.

(வி - ம்.) பிழம்பு மூன்றையும் திரண்டவெனப் பொருள் கொள்க. இருநாகம் - பாம்பு, யானை.

(15)

(இ - ள்.) பெருமையாகிய தவங்களை வருந்திச் செய்து தன்களங்கம்நீங்கப்பெற்றுப் பேரொளிமிகுந்து திருந்திய வெள்ளிய சந்திரன் ஆகாயத்தின்கண்ணே யெழாநிற்க நீண்ட சடையின்கண்ணே பொருந்திய ஒப்பற்ற ஒரு பாம்பானது அமிர்தினைப் பார்க்கினும் இது பெருஞ் சுவையினை யுடைய தாகுமென்று தாவி வாயாற்கவ்வி மீண்டும் அச்சடை காட்டிற் பொருந்தினாற்போல விளங்குகின்ற காம்புயர்ந்த குடையானது சொரிகின்ற கிரணங்கள் நிழல்விரிய.

(வி - ம்.) உழந்து - செய்து. வாவி - தாவி. வௌவுபு - கௌவி மீண்டு பொருந்தினாலென - சடையின் மீண்டு பொலிந்தாற்போல. பம்ப - விரிய.

(16)