(இ - ள்.) ஆன்மதத்துவம், வித்தியாதத்துவம், சிவதத்துவ மென்னும் முறையாகக் காணப்பெற்ற முப்பத்தறுவகைத் தத்துவங்களாகிய படிகள் பக்கத்தே பொருந்தச் செய்வித்த பசும்பொன்னினாகிய அணையாகிய விடத்தில் அழகிய வளையலை யணிந்த உமையம்மையாருக்குப் பக்கலில் குமரக்கடவுள் வேறொருவர்க்கில்லாத சிறப்புடனெழுந்தருளியிருப்பச் சிவபெருமானு மங்ஙனமே வீற்றிருந்தனன் முன்னொரு காலத்து.

(வி - ம்.) ஆறிரு மூன்று - ஆறாறு முப்பத்தாறென்க. சோபானம்-படி; "பெருகு தத்துவங்களென்னும் பெரிய சோபானமேறி" என்னும் பெரியபுராணச் செய்யுளா னறிக. பால்துதைய - பக்கத்தே பொருந்த. சுவாமிக்கு மம்பிகைக்கு மிடையில் குமரக்கடவு ளிருந்தன ரென்க.

(4)

(இ - ள்.) அத்தன்மைத்தாகிய காலத்தினை யறிந்து இருவினையின்கண்ணும் சமமாகிய அறிவுடைமையால் நல்வினை தீவினையாகிய இருகன்மங்களும் சமமாகப் பொருந்தப்பெற்ற தவத்தினை யுடையனாய் முத்தியை விரும்பிய வுள்ளத்தின்கண் அமையாத பத்தியாய பித்தினையுடையானாய்ச் சந்திரகாசனென்னும் பெயரை மேற்கொண்டுள்ளவன் உண்மையோடு கூடிய சிவகணங்களுள் மேலானவன் அவ்விடத்து விரைந்து சென்றான்.

(வி - ம்.) செவ்வி - காலம். வினைச்சமமாயெனவும் கன்மமொத்த எனவும் இருகாற் கூறுதலின் முன்னது உயரறிவின்கண் ணிகழ்வதெனவும் பின்னது கன்மத்தின்கண் நிகழ்வதெனவும் கொள்க. முத்தியை வேட்டவுளத்தானாப் பித்தினன் - முத்தியை விரும்பிய உள்ளமுடைமையாற் பித்தானவன். அவ்வன்பு பித்து போறலிற் பித்தென்றார். இதனை "பித்துப்பத் தரினத்தாய்" எனவரும் சிவஞான போத வுதாரண வெண்பாவடியானும் அதன் உரையானு முணர்க.

(5)

(இ - ள்.) எட்டங்கத்தானும் ஐந்தங்கத்தானும் பொருந்த வணக்கஞ்செய்து எழுந்துநின்று பெருகியுள்ளே யநுபவிக்கின்ற அன்பான துருகச் செய்ய வெயிலின்கட்பட்ட வெண்ணெ யுருகியதைப்போல நெகிழ்ச்சியுற்றுக் கண்களிற் குளிர்ந்த ஆநந்தவெள்ள மொழுகக் குவிந்த தாமரை மலரென்று சொல்லும்வண்ணம் கரங்களைச் சிரத்துக் கூப்பி விண்ணப்பஞ் செய்வான்.

(வி - ம்.) எட்டு - அட்டாங்கம். ஐந்து - பஞ்சாங்கம். இவை முறையே சிரம், கரம், கன்னம், புயமிரண்டு, உதரம் இவை பூமியிற்படியும்படி