அது - தத்துவமசி. இரணம் - போர். முருக்க - கெடுக்க. அரணம் -
பற்றுக்கோடு.

(120)

(இ - ள்.) படம் விளங்குகின்ற பாம்பினை மாலையாகக் கொண்ட சிவபெருமான் முருகனைத் தியானித்து அரிய தவத்தினை அவ்விடத்து ஒருகணம் செய்து தான் கருதிய எண்ணமெல்லாம் முற்றுப்பெறலால் கணிக வெற்பெனும் பெயரினோடு விளங்கும். தெளிந்த கிரணங்கள் ஒளியை வீசுகின்ற ஒன்பான் வகையாகிய மணிச்சிறு குன்றுகள் சூழ்ந்த அத்தணிகை மலையின்கண் இன்றும் அழகு விளங்குகின்ற தவ முதலிய புண்ணிய காரியங்களை ஒருகணப்பொழுது செய்யினும் செய்தவர்கள் பெறுதற்கரும் பெரும்பயனை யடைவார்கள்.

(121)

(இ - ள்.) தோற்றமு மிறுதியும் நீங்கித் தனக்கு மேலான மூலப் பொருளில்லாத மூலகாரணப் பொருளாங் கடவுட்கு முதலாயிருந்து அறம்பொருளின்பம் வீடென்னும் நால்வகைப் பொருட்குங் காரணமாகிய அரிய வேதத்தின் முதலிலுள்ள மகாமந்திரத்தின்கண்ணுள்ள பொருட் செறிவை எல்லாத் தேவர்களுக்கு முதலானவனாகிய குமரப் பெருமான் திருவாய் மலர்ந்தருளினமையான் மூலமலை யென்று சொல்லப்படும். குறவர்கள் கிழங்கை யாராய்ந்தெடுக்கின்ற அரிய மூங்கில்களையுடைய அத்தணிகைமலை.

(வி - ம்.) மூலமென்பதற்கு - முதல், காரணம், கிழங்கு எனப் பொருள் கொள்க. வான் - பெரிய. வரை - மூங்கில். பறம்பு - மலை.

(122)