(இ - ள்.) பொருக்குகள் பொருந்திய முகிழினையுடைய தூரோடு கூடிய இருப்பை மரங்கள் பூத்திருப்பன (ஆகாயத்திற்) பரந்த மேகங்களினிடையிடையே கலந்தொளிர்கின்ற உடுக்களையும் சுரிந்த கூந்தலினையுடைய பெண்களின் உச்சிக்கொண்டையிற் றொங்குகின்ற ஒளியைச் சொரிகின்ற முத்துக்களையு மொக்கும் என்று சொல்வர் அறிவுடையோர்.

(வி - ம்.) சுரிகுழல் - அன்மொழித்தொகை; தாழ்குழல் என்றாங்குக் கொள்க; முச்சி - உச்சிக்கொண்டை; கதிர்சொரி நித்திலமாகிய மணியென்க. பொகுட்டு - இருப்பை மரத்திற் றோன்றும் புடைப்பு; இனி 'என்ப' என்பதை யாசையாக்கி ஒப்பாகுமெனப் பொருள் கொள்ளினுமமையும்; "வெலற்கருங் குஞ்சர" மென்னும் முதற் குறிப்பையுடைய சிந்தாமணிச் செய்யுளினீற்றடியில் 'பிறவு மென்பவே' என வந்திருத்தல் காண்க. இது உவமையணி.

(55)

(இ - ள்.) குறிஞ்சி முல்லை மருதம் நெய்தல் என நான்கு வகையாகச் சொல்லப்படுகின்ற நிலங்களுந் (தனக்கு) இடமாக விளங்குகின்ற அழகிய பாலைத்திணைக்குப் பொருந்த யாவராலு மிகழப்பெறுகின்ற பாலைநிலமாக்களடைகின்ற போகங்களும் யாவராலும் புகழப்படுகின்ற (பாலையொழிந்த ஏனைய) நான்கு நிலத்தினுமுள்ளாருடைய போகமேயாம்.

(வி - ம்.) நிகழ்தரு - சொல்லப்பெறுகின்ற; எல்லை - இடம்; பாலைத்திணைக்கு ஏற்புறுதல் - தனக்குச் சிறிதுமிடமின்றி ஏனைய நானிலத்தினுங் கலந்திருத்தல்; பாலைநிலத்தவர் போகமாதல் - நானிலத் துள்ளாரையும் ஆறலைத்தலானும் ஆண்டுச்சென்று சூறைகொள்ளுதலானும் வந்தபொருளை நுகர்தலாம்; இவ்விரு வகையினர் செயல்களை நோக்கி 'இகழ்தரு' 'புகழ்தரு' என அடைகொடுத்தார்; அம்முந் தம்முஞ் சாரியை.

(56)

(இ - ள்.) விதி தம்முட் கூட்டக்களவிற் புணர்ந்து உடன்போக்கிற் கூடச் செல்கின்ற தலைவன் தலைவியர்க்கு தந்தை தன்னைமாரால் இடையூறொரு சிறிதுமில்லையாகத் தாங்கற் கருமையாகிய பெரிய மகிழ்ச்சியினை யுளவாக்கிப் பெண்களை (அயர் வுயிர்க்கும் பொருட்டு)